Sovjetunionen.com

For nokre dagar sidan (18.09) var Mikhail Saakasjvili gjest på intervjuprogrammet Hardtalk på BBC. I kjend Hardtalk-stil vart Saakasjvili grilla av Stephen Sackur, som gjennom programmet stilte fleire svært interessante spørsmål den georgiske presidenten ikkje var i stand til å svare på. I tillegg kom Saakasjvili sjølv med ein del ganske overraskande svar og kommentarar. Heile intervjuet kan sjåast på BBC sine nettsider på http://news.bbc.co.uk/1/hi/programmes/hardtalk/7623150.stm

( Vel, “sjåast” er å ta litt hardt i. Det BBC har tilgjengeleg er ei realplayer-fil med svært låg oppløysing, om enn med god lyd. På dette punktet ligg den norske rikskringkastinga årevis framfor sine britiske kollegar.)

Youtube er proppfullt av heilt fantastiske kortfilmar og animasjonsfilmar. Her er ein av dei.

Vil berre reklamere litt for den nye storsatsinga til Studentutvalet ved Det humanistiske fakultet. Manah Manah er eit klubblokale i kjellaren på Sydneshaugen Skole, som vil fungere som HF sin internpub. Les gjerne meir om saka på HFSU eller Manah Manah sine sider.

I perioden 2005-2006 jobba eg dels som engelsklærar, dels som ungdomsarbeidar med fysisk og psykisk utviklingshemma born og unge i utkantsprovinsen Ningxia i Kina. Voluntørprosjektet var resultatet av samarbeid mellom Red Cross Nordic United World College, Røde Kors, Fredskorpset og Ningxia University. Prosjektdeltakarane frå året etter meg tok til på eit prosjekt for å ta med seg elevane frå ein skule for døve og blinde i Yinchuan til å oververe Paralympics i Beijing. Etter mykje motgang, økonomiske vanskar og uvisse er prosjektet i boks, og vel gjennomført.

NRK har laga eit innslag frå Paralympics med dei to norske deltakarane og fleire av ungane “mine”. Innslaget er tilgjengeleg på http://www1.nrk.no/nett-tv/indeks/144049

Meir informasjon om både paralympicsprosjektet og prosjektet eg tok del i finn du på sinonor.com

I dag fyller Dmitrij Anatoljevitsj Medvedev 43 år. Den russiske presidenten vert i media ofte omtalt som “ein av dei yngste statsleiarane i verda”, noko som for so vidt ikkje er heilt feil. Om ein skal tru på Wikipedia (i dag gjer vi det) er Medvedev per dags dato den fjortande yngste statsleiaren i verda. Mannen er heile femten år eldre enn kongen av Bhutan, elleve år eldre enn regenten av San Marino og sju år eldre enn statsministrane i Den Dominikanske Republikk og Elfenbeinskysten. Presidenten og statsministeren av Georgia er henholdsvis tre og seks år yngre enn Medvedev. Skulle ting gå riktig ille i det amerikanske presidentvalet vil aldersskilnaden mellom den russiske og amerikanske presidenten vere 29 år.

Vi på Kvitlauk feirar den store dagen med ein kopp te og eit speilegg.